Schöni Ouge

Schöni Ouge gö eim nümm us em Chopf. Ouge säge vil uus. Si chöi truurig sy oder Fröid usdrücke. Alti Ouge hei vil gseh u sy immer no schön. U si erinnere eim dra wies isch gsy, wo me se ds erscht Mal entdeckt het. D Elisabeth Zurbrügg isch e ehemaligi Büüri us em Bärner Seeland. Si versteits, Gschichte yzfah, wo re Lüt verzelle u zwüsche de Zyle z läse. Eso wie denn, wo re dä Maa vo de schöne Ouge verzellt het oder wo si het gmerkt, dass die Ouge, wo se da aaluege, truurig sy. I irgend ere Form spile i vilne Gschichte hie d Ouge e Rolle. Fyni Gschichte vo Mönsche, wo zwüsche üs läbe.