E Läbchueche uf Wienachte

Am Ändi vo jedem Jahr wartet geng wider es Wienachtsfescht. Wie dass d Mönsche das Fescht fyre, ob si sech druuf fröie, sogar druuf plange wie nes Chind oder mit gmischte Gfüehl däm Familieschluuch entgäge luege, isch ganz underschidlech. Verschideni Mönsche u ihri eigeti Art Wienachte z fyre, begägne üs o i däm Buech. Vomene Heilige Aabe im brasilianische Urwald oder ere Familiezämekunft imene ärmleche Oberländer Bärgbuure-Heimetli cha me da läse. Eis Wienachtspäckli bringt Glück uf Moldawie, u d Liebi zue de Tier u Pflanze bringt Mönsche wider zuenenand. Die Wienachtsgschichte beschrybe ds Läbe vo ganz alltägleche Lüt u berüehre mit ihrer Wysheit u Mönscheliebi d Härz vo de Läserinne u Läser. Gfüehlvolli, versöhnlechi und überraschendi Wienachtsgschichte zum Vorläse u mit anderne teile.